Жаннатмакон юртимизнинг мустақиллигига 25 йил тўлган бўлса, шу 25 йил мобайнида давлатимизнинг биринчи Президенти И. А . Каримовнинг саъй ҳаракатлари ва раҳнамолигида мисли кўрилмаган ўзгаришлар ва янгиланишлар амалга оширилди. Уй-жой қурилишлари, спорт ишноотлари, завод ва фабрикалар , масжид ва мадрасалар, санъатга бўлган эътибор ва ҳокозо... Ҳеч бир юртда бизнинг юртимиздагидек ёшларга ғамхўрлик, халқига эътибор йўқ. Ёшларимиз спорт бўйича олтин ва кумуш медаллар совриндорлари бўлиб, чет элларда юртимиз байроғини баландларга кўтармоқда. Ўқитувчилар ва мураббийлар, шифокорлар, фермерлар, тадбиркорлар каби барча соҳа вакилларига берилган орден ва медаллар ҳамда юксак ишонч уларни янада куч-ғайрат билан ишлашга ундамоқда.
Тадбиркорлар учун, халқ учун шундай кенг имкониятлар яратиб бериляптики, уларни ғайратига ғайрат қўшилиб, қўлларидан келганча юртга хизмат қилишларини изҳор этиб хурсандчиликларини намоён қилмоқдалар. Талабалар учун, коллежни битирган ёшлар учун имтиёзли кредитлар бериляпти. Ёшларимизга кўпдан-кўп шарт-шароитлар давлатимиз томонидан яратиб берилмоқда. Хуллас амалга оширилаётган ғамхўрликларни санаб, тил билан айтиб, қўл билан ёзиб саноғига етолмаймиз. Булар учун эса албатта Аллоҳ таолога шукроналар келтиришимиз керак.
Шундай жаннатмакон юртни гўзалликларини, мусаффолигини кўролмайдиган кўзи кўр, қалби сўқир кимсалар ҳам йўқ эмас. Баъзи ёшларимиз интернет орқали бизнинг юртимизни кўролмайдиган ғаламислар билан танишиб, уларнинг алдовларига учиб, уларга қўшилиб кетаётгани ачинарли ҳолат. Шу билан бирга баъзи аёлларимиз арзимаган пуллар эвазига ўз ватандоши бўлган қизларни алдаб чет давлатларга ишлагани кетяпти деб уйидагиларни ишонтириб, не куйларга соляпти. Бу ишлар эса покдомон ва назокатли аёл номига, меҳрибон ва мунис она деган мўътабар номга доғ туширишдир.
Улар қилаётган ишларини ҳеч ким билмайди деб ўйлашади.
Мен ундай кимсаларни кўзи ҳам сўзи ҳам, қалби ҳам кўр кимсалар дегим келади. Улар енгил яшашга ўрганган. Меҳнат қилиб кун кечиришни ҳоҳламайди. Бизнинг юртимизда ишлайман деса иш, яшайман деса жой ҳамиша топилади. Айнан бошқа давлатларга бориб ишлаш шарт эмас. Аммо бу шарт-шароитлардан унумли фойдаланишни билмаганлар, чет элларга ишлашга бориб ўз ватанини сотган сотқинлар, ҳар хил оқимларга қўшилиб кетмоқдалар. Ундай кимсалардан огоҳ бўлишимиз, уларни тўғри йўлга бошлашимиз, ҳар биримиз болаларимизни нима ишлар билан шуғулланишини билишимиз, телефонларини текшириб, кимлар билан дўст тутиниб, кимлар билан мулоқотда бўлаётганликларидан хабардор бўлиб туришимиз керак. Бу барчамизнинг бурчимиздир. Чунки бундай тинч ва осуда ватан ер юзида жуда ҳам кам. Қўшни давлатларда содир бўлаётган уруш -жанжаллар, қўпорувчиликларни кўриб эшитиб турибмиз. Шундай экан Аллоҳ таоло бизга берган энг олий неъмат тинчлигимизни асраб авайлашимиз ва унинг қадрига етишимиз лозим. Қўлларимизни дуога очиб Қудратли ва Меҳрибон Аллоҳ таолодан илтижо қилиб сўраймизки, юртимиз тинчлигини барқарор айласин.
Олтинсой тумани маҳалла отинойиси: Абдиева Орзигул