Маълумки, инсоният ҳаёти давомида турли мафкура ва маслаклар ўртасидаги зиддиятлар ва қарама- қаршиликларни бошидан кечирган. Бунинг оқибатида ўзаро келишмовчиликлар юзага келди. Мисол учун, салб урушлари инсоният бошига жуда кўп бало-офатларни келишига сабаб бўлди. Бундан айниқса аҳолисини аксарияти мусулмон бўлган юртлар мисли кўрилмаган зарар кўрди . Ундан кейин Мўғул босқинчилари тамонидан бошланган урушлар натижасида инсоният бошига қанча балолар ёғилди. Мусулмон оламининг бошига тушган учунчи катта мусибат мустамлакачилик бўлди . Бу сафарги мусибат аввалги икки мусибатдан кам бўлмади. Ушбу сиёсат бўйича олиб борилган ҳаракатлар натижасида кўпгина давлатлар қатори бизларнинг ўлкаларимиз ҳам ақл бовар қилмас даражада зарар кўрди
Узоқ йил давом этган мустамлакачилик даврини кўз олдимизга келтирайлик! Бир пайтлар ўзининг қудратли давлатчилиги, илму- маърифат бобида дунёга устозлик қилган буюк фарзандлари ,юксак илму маданияти , обод шаҳару қишлоқлари билан дунёни ҳайратда қолдирган бу буюк халқнинг динидан , азалий қадриятларидан ўзлигидан ажратишга ҳаракат қилдилар .
Шуни алоҳида такидлаш лозимки, собиқ мустабид тузум ҳукмронлик қилган даврида халқимизнинг бошига қанчалар азобу уқубатларни ёғдирганини , албатта ҳеч қачон унутиб бўлмайди. Ўша машум йилларда кўпчилик жаноза маросимларига бориш, яқин кишисини юқотган одамлардан кўнгил сўрашдан ҳам қўрқиб қолдилар.
Аллоҳ таолога беҳисоб шукрлар бўлсинким, тинчликсевар ва эрксевар халқимизнинг асрий орзулари бўлмиш мустақиллик неъматига эришдик. Албатта бу неъматга осонликча эришганимиз йўқ. Қанчадан-қанча қурбонлар, тинимсиз изланишлар, қанчадан –қанча бедор тунлар эвазига эришилди. Шунинг учун бу улуғ неъматни кўз қарочиғидек асраб авайлаш ва унинг абадий бўлиши учун Аллоҳга шукрлар айтиб боришимиз лозим. Зотан , Аллоҳ таоло Қурони каримда марҳамат қилади: “Агар берган неъматларимга шукр қилсангиз албатта, уни зиёда қилиб бераман” деган.
Истиқлол халқимиз учун чексиз имкониятлар эшигини очиб берди. Барча соҳалар қатори- мустақиллик дин аҳлига кўрсатган ижобий тасири янада улкан бўлди.
Тарихан қисқа давр ичида мустақил давлатимиз асрларга татигулик бунёдкорлик ишларини амалга ошириб, дунё мамлакатларини эътирофига сазовор бўлди. Бу улкан ютуқларни қўлга киритишимизда тинчлик ва хотиржамлик омил бўлганлигини алоҳида такидлаб ўтиш лозим. Гап тинчлик ва хотиржамлик хусусида борар экан Пайғамбаримизнинг бу борада айтган муборак ҳадисларини эсламасликни иложи йўқ. “ Икки неъмат борки , кўпчилик инсонлар унинг қадрига етмайдилар. У –хотиржамлик ва сиҳат - саломатлик” (Имом Бухорий ва Имом Термизий ривояти)
Демак ,тинчлик ва хотиржамлик Аллоҳ таолонинг иккита бебаҳо неъмати бўлиб , ҳамма ҳам ундан баббаравар баҳраманд эмас. Тинчлик нақадар бебаҳо неъмат эканини ундан маҳрум инсонлар яхши билади.
Ҳозирги вақтда юрт тақдирига дахлдорлик ҳисси билан яшаб, ён-атрофимизда бўлаётган ҳодисалардан огоҳ бўлиб, унинг асл моҳиятини тўғри таҳлил қилиб, кейин ёшларимиз ўртасида тинчлик ва барқарорликнинг қадрига етиш, дунёнинг турли мамлакатларида хусусан, айрим араб давлатларида давом этаётган хунрезликларнинг асл сабабларини тушунтиришимиз зарур .Айниқса Яқин Шарқ давлатларида муқаддас Ислом динини ниқоб қилиб, ўзларининг ғаразли мақсадларига эришишга уринаётган динбузар тўдаларнинг олиб бораётган ғайриинсоний хатти ҳаракатлари мутлақо динга зид амаллар эканини яхши билиб, улар ва уларга хайрхоҳлик билдираётган кишиларга қарши доимо огоҳ ва сергак бўлиш ҳам, аслида барчамизнинг муқаддас бурчимиз. Аллоҳ таоло Қурони каримда марҳамат қилади: “Эй имон келтирганлар! Барчангиз ёппасига тинчлик ишига киришингиз” (Бақара ,208)деилган
Исломнинг бутун мўмин- мусулмонларга амри ана шундай ёппасига тинчлик ишига кириш эканлигини ҳар бир мусулмонман деб даъво қилаётган инсон билганида эди. Ислом дини кўзлаган тинчлик дунё бўлаб тарқалар эди. Унда қалблар тинч, қўни қўшнилар тинч, жамиятлар тинч, давлатлар тинч , ҳаттоки ҳайвоноту - наботот ва бутун борлиқ тинч бўларди. Аммо минг афсуслар бўлсинким, ўзларини Ислом динини ҳақиқий “ ҳомийси” деб даъво қилаётган инсонлар бу илоҳий буйруққга хилоф амал қилмоқдалар. Чунки,тинчлик қарор топган юртда фарзандлар эмин эркин камолга эришади,оқибатда,жамиятда ҳар тамонлама юксалишва ривожланиш рўй беради.
Илоҳо ер юзида жумладан жаннат макон Юртимизда тинчлик ва осоишталик абадий булсин