Аввал хабар берилганидек, ўзбекистонлик умра зиёратчилари уч кун мобайнида Мадина шаҳрида бўлиб, Расулуллоҳ (с.а.в.) қабрларини зиёрат қилиш билан биргаликда, ислом тарихида ўз ўрнига эга бўлган қадамжоларни бориб кўрдилар. Жумладан “Қубо” ва “Қиблатайн” масжидлари, Уҳуд тоғи каби табаррук жойлар зиёратчиларимиз хотираларида узоқ вақт муҳрланиб қолиши муқаррар.

Мазкур ибодат ва зиёратлар ўзбекистонлик ишчи гуруҳлари ва ҳамкор ширкат вакиллари томонидан ташкил этилмоқда.

Мадинаи мунаввардаги уч кунлик зиёратдан сўнг фуқароларимиз, 18 февраль куни эрта тонгда умра ибодатини адо этиш учун Маккаи мукаррамага жўнаб кетдилар. Уларни Мадина шаҳридан ишчи гуруҳлари замонавий автобусларда кузатиб қўйдилар.

Зиёратчиларимиз Макка томон йўлга чиқар эканлар, кўзда ёш ила шундай кунларга етганлари учун шукроналар айтиб, бундай шароитларни ташкил этишга раҳнамолик қилган муҳтарам Президентимиз бошчилигидаги барча раҳбарлар ҳаққига ва Она – Ватанимиз фаровонлиги учун дуолар қилмоқдалар.